వరల్డ్‌ రోయింగ్‌ కప్‌లో చరిత్ర.. భారత్‌కు తొలి స్వర్ణ పతకం

2026 వరల్డ్‌ రోయింగ్‌ కప్-IIIలో భారత్‌ క్రీడా చరిత్రలో నిలిచిపోయే ఘనత సాధించింది. లైట్‌వెయిట్‌ మెన్స్‌ డబుల్‌ స్కల్స్‌ విభాగంలో భారత జోడీ ఉజ్వల్‌ కుమార్‌, లక్షయ్‌ స్వర్ణ పతకాన్ని గెలుచుకుని వరల్డ్‌ రోయింగ్‌ కప్‌ చరిత్రలో దేశానికి తొలి గోల్డ్‌ మెడల్‌ను అందించారు. ఫైనల్‌లో ప్రారంభం నుంచే భారత జోడీ ధాటిగా పోటీ పడింది. హాంకాంగ్‌, నెదర్లాండ్స్‌ జట్లు గట్టి సవాల్‌ విసిరినా ఉజ్వల్‌, లక్షయ్‌ తమ లయను కోల్పోలేదు. చివరి వరకు వేగాన్ని నిలబెట్టుకుని 6:26.09 నిమిషాల్లో రేస్‌ను ముగించారు. హాంకాంగ్‌ 6:27.14 నిమిషాలతో రెండో స్థానంలో నిలిచి రజత పతకం గెలుచుకోగా, నెదర్లాండ్స్‌ 6:27.36 నిమిషాలతో మూడో స్థానంలో నిలిచి కాంస్యాన్ని దక్కించుకుంది. ఈ విజయానికి మరో ప్రత్యేకత ఉంది. స్వర్ణ పతకం సాధించిన ఇద్దరు అథ్లెట్లు భారత ఆర్మీకి చెందినవారు. లాసెర్న్‌లో జరిగిన ఈ టోర్నీకి భారత్‌ నుంచి వెళ్లిన 18 మంది సభ్యుల బృందంలో 17 మంది ఆర్మీ అథ్లెట్లే ఉండటం విశేషం. మరో అథ్లెట్‌ భారత నేవీకి చెందినవారు. ఇది భారత సైన్యం రోయింగ్‌ క్రీడాభివృద్ధిలో పోషిస్తున్న పాత్రను స్పష్టంగా చూపిస్తోంది. గత కొన్నేళ్లుగా రోయింగ్‌ క్రీడకు సైన్యం మౌలిక సదుపాయాలు, శిక్షణ, క్రీడా వనరుల పరంగా బలమైన మద్దతు అందిస్తోంది. అంతర్జాతీయ ప్రమాణాలకు అనుగుణంగా అథ్లెట్లను తీర్చిదిద్దేందుకు ప్రత్యేకంగా కృషి చేస్తోంది. ఈ నిరంతర శ్రమ ఇప్పుడు వరల్డ్‌ రోయింగ్‌ కప్‌లో స్వర్ణంగా మారింది. భారత్‌కు ఈ గోల్డ్‌ పతకం కేవలం ఒక విజయమే కాదు; దేశ రోయింగ్‌ భవిష్యత్తుకు బలమైన సంకేతం. అంతర్జాతీయ వేదికలపై భారత రోయర్లు మరింత పోటీ ఇవ్వగలరనే నమ్మకాన్ని ఈ ఫలితం పెంచింది. రాబోయే ప్రపంచ స్థాయి పోటీల్లో మరిన్ని పతకాలకు ఇది మార్గం చూపే విజయంగా నిలవనుంది.