వందే భారత్ రైళ్లను నడిపే సిబ్బంది ఎంపిక, జీతం వివరాలివే

దేశవ్యాప్తంగా ప్రాచుర్యం పొందిన వందే భారత్ రైళ్లను ఎవరు నడుపుతారు, వారికి ఎంత జీతం అందుతుంది అనే విషయాలపై అనేక కథనాలు ప్రచారంలో ఉన్నాయి. అయితే “వందే భారత్ లోకో పైలట్” పేరుతో ప్రత్యేకంగా నేరుగా ఉద్యోగంలోకి తీసుకునే నియామక విధానం లేదు. రైల్వే రిక్రూట్‌మెంట్ బోర్డు పరీక్షల ద్వారా అభ్యర్థులు ముందుగా అసిస్టెంట్ లోకో పైలట్ పోస్టుకు ఎంపికవుతారు. కంప్యూటర్ ఆధారిత పరీక్షలు, సామర్థ్య పరీక్ష, పత్రాల పరిశీలన, వైద్య పరీక్షల్లో అర్హత సాధించాలి. అనంతరం సంబంధిత రైల్వే జోన్ అభ్యర్థికి నియామకం, శిక్షణ, పోస్టింగ్ ఇస్తుంది. అసిస్టెంట్ లోకో పైలట్ పోస్టుకు పదో తరగతితో పాటు గుర్తింపు పొందిన సాంకేతిక ట్రేడులో ఐటీఐ అవసరం. సంబంధిత ట్రేడులో అప్రెంటిస్‌షిప్ పూర్తి చేసినవారు కూడా అర్హులు. మెకానికల్, ఎలక్ట్రికల్, ఎలక్ట్రానిక్స్ లేదా ఆటోమొబైల్ ఇంజినీరింగ్‌లో మూడేళ్ల డిప్లొమా లేదా పేర్కొన్న విభాగాల్లో ఇంజినీరింగ్ డిగ్రీ ఉన్నవారు కూడా దరఖాస్తు చేసుకోవచ్చు. 2026 నియామక ప్రకటన ప్రకారం సాధారణ వయోపరిమితి 18 నుంచి 30 సంవత్సరాలు. రిజర్వేషన్ వర్గాలు, మాజీ సైనికులు, ఇతర అర్హత కలిగిన అభ్యర్థులకు నిబంధనల ప్రకారం సడలింపులు ఉంటాయి. అసిస్టెంట్ లోకో పైలట్ పోస్టుకు ఏ–1 వైద్య ప్రమాణం వర్తిస్తుంది. రెండు కళ్లలోనూ అద్దాలు లేకుండా 6/6 దూరపు చూపు ఉండాలి. దగ్గర చూపు, రంగులను గుర్తించే సామర్థ్యం, రాత్రి చూపు, రెండు కళ్ల సమన్వయం, దృష్టి పరిధికి సంబంధించిన పరీక్షల్లో కూడా అర్హత సాధించాలి. లాసిక్ లేదా ఇతర శస్త్రచికిత్సల ద్వారా కంటి చూపును సరిచేసుకున్న అభ్యర్థులు ఈ పోస్టుకు అర్హులు కాదని అధికారిక నోటిఫికేషన్ పేర్కొంది. ఉద్యోగం రైల్వే భద్రతకు నేరుగా సంబంధించినందున వైద్య ప్రమాణాల విషయంలో మినహాయింపులు పరిమితంగా ఉంటాయి. అసిస్టెంట్ లోకో పైలట్‌గా చేరిన వెంటనే వందే భారత్ రైలులో విధులు ఇవ్వరు. రైల్వే ప్రాథమిక సాంకేతిక శిక్షణ, భద్రతా శిక్షణ, ప్రత్యక్ష విధులు, పదోన్నతి ప్రక్రియల తర్వాత అర్హత కలిగిన సిబ్బందిని వివిధ ప్రయాణికుల రైళ్లకు కేటాయిస్తుంది. వందే భారత్ ట్రైన్‌సెట్‌పై విధులు నిర్వహించే లోకో పైలట్, అసిస్టెంట్ లోకో పైలట్‌లకు క్యాబ్ నియంత్రణలు, విద్యుత్ వ్యవస్థ, బ్రేకింగ్, ట్రైన్‌సెట్ ప్రారంభం, నిలిపివేత, క్యాబ్ మార్పు, అత్యవసర పరిస్థితులు, అగ్ని ప్రమాదాలు, సిగ్నల్ వ్యవస్థపై ప్రత్యేక శిక్షణ ఇస్తారు. సిమ్యులేటర్, హ్యాండ్స్-ఆన్ శిక్షణ కూడా ఇందులో భాగమవుతుంది.