డిగ్రీ అర్హతతో కేంద్ర ప్రభుత్వ ఉద్యోగాలు.. పోలీస్ శాఖలో 1871 ఎస్‌ఐ పోస్టులు

స్టాఫ్ సెలక్షన్ కమిషన్ (SSC) కేంద్ర ప్రభుత్వ ఉద్యోగాల కోసం ఎదురుచూస్తున్న అభ్యర్థులకు గుడ్‌న్యూస్ అందించింది. ఢిల్లీ పోలీస్, సెంట్రల్ ఆర్మ్‌డ్ పోలీస్ ఫోర్సెస్ (CAPF)లో సబ్‌-ఇన్‌స్పెక్టర్ నియామక పరీక్ష-2026కు సంబంధించిన నోటిఫికేషన్‌ను విడుదల చేసింది. ఈ రిక్రూట్‌మెంట్ ద్వారా మొత్తం 1871 సబ్‌-ఇన్‌స్పెక్టర్ పోస్టులను భర్తీ చేయనున్నారు. ఇందులో CAPF పరిధిలోని BSF, CISF, CRPF, ITBP, SSB విభాగాలతో పాటు ఢిల్లీ పోలీస్ పోస్టులు ఉన్నాయి. విభాగాల వారీగా చూస్తే CAPFల్లో సబ్‌-ఇన్‌స్పెక్టర్ (GD) పోస్టులు 1320, ఢిల్లీ పోలీస్ సబ్‌-ఇన్‌స్పెక్టర్ (ఎగ్జిక్యూటివ్) పురుషుల పోస్టులు 205, మహిళల పోస్టులు 112, CAPF సబ్‌-ఇన్‌స్పెక్టర్ (ఫైర్) పురుషుల పోస్టులు 234 ఉన్నాయి. అర్హత విషయానికి వస్తే సాధారణ సబ్‌-ఇన్‌స్పెక్టర్ పోస్టులకు ఏదైనా బ్యాచిలర్ డిగ్రీ పూర్తి చేసి ఉండాలి. CAPF ఫైర్ పోస్టులకు ఫిజిక్స్, కెమిస్ట్రీ, మ్యాథమెటిక్స్ సబ్జెక్టులతో డిగ్రీ లేదా సంబంధిత ఇంజినీరింగ్ డిప్లొమా అవసరం. అభ్యర్థుల వయసు సాధారణ పోస్టులకు 20 నుంచి 25 సంవత్సరాల మధ్య ఉండాలి. CAPF ఫైర్ పోస్టులకు 18 నుంచి 30 సంవత్సరాల వరకు వయోపరిమితి ఉంటుంది. రిజర్వేషన్ వర్గాలకు నిబంధనల ప్రకారం వయో సడలింపు ఉంటుంది. ఆన్‌లైన్ దరఖాస్తుల ప్రక్రియ సెప్టెంబర్ 10, 2026 నుంచి ప్రారంభమైంది. సెప్టెంబర్ 30, 2026 వరకు దరఖాస్తు చేసుకోవచ్చు. ఎంపిక ప్రక్రియలో కంప్యూటర్ ఆధారిత పరీక్ష, శారీరక దారుఢ్య పరీక్ష, ఫిజికల్ స్టాండర్డ్ టెస్ట్ ఉంటాయి. ఎంపికైన సబ్‌-ఇన్‌స్పెక్టర్లకు నెలకు రూ.35,400 నుంచి రూ.1,12,400 వరకు వేతనం లభిస్తుంది. కేంద్ర ప్రభుత్వ నిబంధనల ప్రకారం ఇతర అలవెన్సులు కూడా అందుతాయి.