హైదరాబాద్ మైలార్‌దేవ్‌పల్లి పోలీస్ స్టేషన్ పరిధిలో విషాద ఘటన చోటుచేసుకుంది. వేడి నీళ్ల బకెట్‌లో పడి నాలుగేళ్ల చిన్నారి మృతి చెందింది. మహబూబ్‌నగర్ జిల్లాకు చెందిన కుటుంబం ఉపాధి కోసం హైదరాబాద్‌కు వచ్చి ప్రగతి నగర్‌లో నివసిస్తోంది. స్నానం కోసం తల్లి హీటర్‌తో నీళ్లు వేడి చేస్తుండగా ఫోన్ రావడంతో బయటకు వెళ్లింది. ఆ సమయంలో ఆడుకుంటున్న చిన్నారి ప్రమాదవశాత్తు బకెట్‌లో పడిపోయింది. ఆస్పత్రికి తరలించినా చికిత్స పొందుతూ ప్రాణాలు కోల్పోయింది.

హైదరాబాద్, సెప్టెంబర్ 11: నగరంలోని మైలార్‌దేవ్‌పల్లి పోలీస్ స్టేషన్ పరిధిలో తీవ్ర విషాద ఘటన చోటుచేసుకుంది. వేడి నీళ్ల బకెట్‌లో పడి నాలుగేళ్ల చిన్నారి మృతి చెందింది. ఈ ఘటన స్థానికంగా విషాదాన్ని నింపింది. మహబూబ్‌నగర్ జిల్లాకు చెందిన ఓ కుటుంబం ఉపాధి కోసం హైదరాబాద్‌కు వచ్చి ప్రగతి నగర్‌లో నివాసం ఉంటోంది. తల్లిదండ్రులతో కలిసి నాలుగేళ్ల చిన్నారి మానస నివసిస్తోంది. గురువారం స్నానం చేసేందుకు తల్లి బకెట్‌లో హీటర్ పెట్టి నీళ్లు వేడి చేసింది. అదే సమయంలో ఆమెకు ఫోన్ రావడంతో మాట్లాడేందుకు బయటకు వెళ్లింది. ఇంట్లో ఆడుకుంటున్న చిన్నారి మానస ప్రమాదవశాత్తు వేడి నీళ్లతో ఉన్న బకెట్‌లో పడిపోయింది. వేడి నీరు శరీరంపై పడటంతో చిన్నారి తీవ్రంగా గాయపడి ఏడవడం ప్రారంభించింది. చిన్నారి ఏడుపు విన్న తల్లి వెంటనే ఇంట్లోకి వచ్చి చూడగా బకెట్‌లో పాప కనిపించింది. వెంటనే స్థానికుల సహాయంతో చిన్నారిని ఆస్పత్రికి తరలించారు. అయితే వైద్యులు చికిత్స అందించినప్పటికీ చిన్నారి ప్రాణాలను కాపాడలేకపోయారు. గారాల పట్టి కూతురిని కోల్పోయిన తల్లిదండ్రులు కన్నీరుమున్నీరుగా విలపించారు. ఘటనపై సమాచారం అందుకున్న పోలీసులు కేసు నమోదు చేసి దర్యాప్తు చేస్తున్నారు. చిన్న పిల్లలు ఉన్న ఇళ్లలో హీటర్లు, వేడి నీటి విషయంలో తల్లిదండ్రులు మరింత జాగ్రత్తగా ఉండాలని ఈ ఘటన మరోసారి గుర్తు చేస్తోంది.