ఆమ్‌స్టర్‌డామ్‌లో ఎన్టీఆర్ జయంతి వేడుకలు, తెలుగు భాష పరిరక్షణపై ప్రవాసుల సంకల్పం

నెదర్లాండ్స్‌లోని ఆమ్‌స్టర్‌డామ్‌లో తెలుగుదేశం పార్టీ వ్యవస్థాపకులు స్వర్గీయ నందమూరి తారక రామారావు 103వ జయంతి వేడుకలు ఘనంగా నిర్వహించారు. నెదర్లాండ్స్ ఎన్‌ఆర్‌ఐ టీడీపీ కార్యదర్శి వెంకట్ కృష్ణ కోక, నవీన్ ఆచంట సమన్వయంతో జరిగిన ఈ కార్యక్రమంలో ప్రవాస తెలుగు ప్రజలు పెద్ద సంఖ్యలో పాల్గొన్నారు. ఎన్టీఆర్ చిత్రపటానికి పూలమాల వేసి ఘన నివాళులు అర్పించారు. కార్యక్రమంలో పాల్గొన్న వక్తలు ఎన్టీఆర్ రాజకీయ, సాంస్కృతిక, సామాజిక సేవలను స్మరించుకున్నారు. తెలుగు ప్రజల ఆత్మగౌరవాన్ని ప్రపంచానికి పరిచయం చేసిన నాయకుడిగా ఆయన పాత్రను గుర్తుచేశారు. మాతృభాష, సంస్కృతి, సంప్రదాయాలను కాపాడుకోవడంలో ప్రవాసుల పాత్ర మరింత కీలకమని అభిప్రాయపడ్డారు. ఈ సందర్భంగా గుంటూరు మిర్చియార్డు మాజీ చైర్మన్ మన్నవ సుబ్బారావు మాట్లాడుతూ, ఒక జాతి అస్తిత్వాన్ని ప్రపంచానికి చాటిచెప్పేది మాతృభాషేనని అన్నారు. ఎన్టీఆర్ తెలుగును ప్రోత్సహించడంలో ఎప్పుడూ ముందుండేవారని తెలిపారు. భాష కేవలం సంభాషణకు మాత్రమే కాదు, ఒక సమాజపు చరిత్రను, సంస్కృతిని, గౌరవాన్ని నిలబెట్టే మూలాధారం అని పేర్కొన్నారు. యూరప్‌లో నివసిస్తున్న ప్రవాసాంధ్రులు తమ పిల్లలకు తెలుగు నేర్పించేందుకు కృషి చేస్తున్నారని ఆయన అభినందించారు. అమెరికాలోని సిలికానాంధ్ర సహకారంతో మాతృభాషను భావితరాలకు అందిస్తూ, మాతృభూమికి దూరంగా ఉన్నప్పటికీ తెలుగు సంస్కృతి, సంప్రదాయాలను పరిరక్షించడం గొప్ప విషయమని అన్నారు. నెదర్లాండ్స్‌లో మనబడి కార్యక్రమం ద్వారా తెలుగు బోధన కొనసాగుతుండడం కార్యక్రమంలో ప్రత్యేకంగా ప్రస్తావించబడింది. నిర్వాహకుల వివరాల ప్రకారం, 25 మంది వాలంటీర్లు వారానికి రెండు రోజులు, నాలుగు గంటల పాటు సుమారు 250 మంది విద్యార్థులకు తెలుగు బోధిస్తున్నారు. విదేశీ నేలపై పిల్లలకు తెలుగు అక్షరాలు, పదాలు, సంస్కృతి పరిచయం చేయడం ప్రవాస సమాజం చేస్తున్న విలువైన సేవగా వక్తలు పేర్కొన్నారు. సంపత్ ఐనంపూడి మాట్లాడుతూ, నెదర్లాండ్స్‌లోని తెలుగు పిల్లలు తెలుగు భాషతో పాటు డచ్, ఇంగ్లీష్, జర్మన్, ఫ్రెంచ్ వంటి భాషలను కూడా అభ్యసిస్తున్నారని చెప్పారు. భౌగోళిక సరిహద్దులు భాషకు అడ్డంకులు కావని పిల్లలు నిరూపిస్తున్నారని అన్నారు. భాష అనేది సాంస్కృతిక వారధి అని, అలాంటి వారసత్వ సంపదను భావితరాలకు అందించడం ప్రతి తెలుగు కుటుంబ బాధ్యత అని పేర్కొన్నారు. అనంతరం ఆయన సిలికానాంధ్ర ఆధ్వర్యంలో నిర్వహిస్తున్న మనబడి బోధనా కేంద్రాన్ని సందర్శించి, తెలుగు నేర్చుకుంటున్న విద్యార్థులను అభినందించారు. పిల్లల్లో మాతృభాషపై ఆసక్తి పెంచుతున్న వాలంటీర్ల సేవలను ప్రశంసించారు. ఈ కార్యక్రమంలో నెదర్లాండ్స్ ఎన్‌ఆర్‌ఐ టీడీపీ అధ్యక్షులు వివేక్ కరియావుల, ఆచంట గోపాలరావు, సత్యనారాయణ సలకి, అమర్ చంద్ రావి, ప్రసాద్ రామినేని, పవన్ గుమ్మడి, ప్రవీణ్ ముమ్మినేని, చైతన్య వెల్లంకి, నవీన్ పరుచూరి, ఫణీష్ పోతురాజు, నంద ఉదయగిరి తదితరులు పాల్గొన్నారు. ఆమ్‌స్టర్‌డామ్‌లో జరిగిన ఈ వేడుక ఎన్టీఆర్ స్మరణతో పాటు విదేశాల్లో తెలుగు భాషను నిలబెట్టే ప్రవాసుల కృషిని స్పష్టంగా చూపించింది.