న్యూజిలాండ్‌లో టీమిండియా టూర్‌కు భారీ క్రేజ్.. రికార్డు స్థాయిలో టికెట్ల విక్రయం!

టీమిండియా న్యూజిలాండ్ పర్యటనకు ఇంకా సమయం ఉన్నప్పటికీ, అక్కడి క్రికెట్ అభిమానుల్లో ఉత్సాహం ఇప్పటికే తారస్థాయికి చేరుకుంది. భారత జట్టు అక్టోబర్‌లో న్యూజిలాండ్‌లో పర్యటించనుండగా, టీ20, వన్డే, టెస్టు సిరీస్‌లలో కలిపి మొత్తం 12 మ్యాచ్‌లు ఆడనుంది. ఈ పర్యటనకు టికెట్ విక్రయాల్లో రికార్డు స్థాయి స్పందన లభిస్తోంది. న్యూజిలాండ్ క్రికెట్ నిర్వహించిన క్రికెట్ నేషన్ సభ్యుల ప్రీ-సేల్ ప్రారంభమైన 48 గంటల్లోనే 26,000 టికెట్లు అమ్ముడయ్యాయి. దీంతో భారత్-న్యూజిలాండ్ సిరీస్‌పై అభిమానుల్లో ఉన్న ఆసక్తి స్పష్టమవుతోంది. ఆక్లాండ్‌లోని ఈడెన్ పార్క్, క్రైస్ట్‌చర్చ్‌లోని హాగ్లీ ఓవల్, వెల్లింగ్టన్ వేదికలపై జరిగే మ్యాచ్‌లకు టికెట్లకు భారీ డిమాండ్ ఏర్పడింది. ముఖ్యంగా 9 వేల సీట్ల సామర్థ్యం ఉన్న హాగ్లీ ఓవల్‌లో అక్టోబర్ 22, 24 తేదీల్లో జరిగే తొలి రెండు టీ20 మ్యాచ్‌లు హౌస్‌ఫుల్ అయ్యే అవకాశం కనిపిస్తోంది. అదేవిధంగా నవంబర్ 27 నుంచి డిసెంబర్ 1 వరకు జరిగే రెండో టెస్టు మ్యాచ్‌కు కూడా అభిమానుల నుంచి మంచి స్పందన వస్తోంది. భారత జట్టు మ్యాచ్‌లు న్యూజిలాండ్‌లో ఎప్పుడూ ప్రత్యేక ఆకర్షణగా నిలుస్తుండగా, ఈసారి టికెట్ విక్రయాల వేగం ఆ క్రేజ్‌ను మరింత స్పష్టంగా చూపిస్తోంది. భారత పర్యటనపై న్యూజిలాండ్ క్రికెట్ అభిమానుల్లో ఉన్న భారీ ఉత్సాహమే రికార్డు స్థాయి టికెట్ విక్రయాలకు ప్రధాన కారణమని న్యూజిలాండ్ క్రికెట్ చీఫ్ మార్కెటింగ్ అండ్ కమర్షియల్ ఆఫీసర్ గ్లెన్ క్రిచ్లీ తెలిపారు. గత సీజన్‌లో ఉన్న టికెట్ ధరలనే కొనసాగించినట్లు వెల్లడించారు. క్రికెట్ నేషన్ సభ్యులకు ముందస్తు టికెట్ విక్రయాల్లో పాల్గొనే అవకాశం ఉండటంతో పాటు 15 శాతం రాయితీ కూడా లభిస్తోంది. సాధారణ టికెట్ విక్రయాలు సెప్టెంబర్ 7 నుంచి ప్రారంభం కానున్నాయి. దీంతో రాబోయే రోజుల్లో టికెట్లకు డిమాండ్ మరింత పెరిగే అవకాశం ఉంది.