జనరిక్ మందులపై ట్రంప్ కొత్త టారిఫ్ విధానం.. భారత్‌కు ప్రభావం?

అమెరికా అధ్యక్షుడు డొనాల్డ్ ట్రంప్ విదేశాల నుంచి దిగుమతి అయ్యే జనరిక్ ఔషధాలపై కొత్త టారిఫ్ విధానాన్ని ప్రకటించారు. ఈ నిర్ణయం ప్రకారం, వచ్చే రెండేళ్ల పాటు ఎలాంటి దిగుమతి సుంకాలు ఉండవని తెలిపారు. 2028 ఆగస్టు నుంచి జనరిక్ ఔషధాలపై 100 శాతం టారిఫ్ అమల్లోకి వస్తుందని, అనంతరం 2029 నుంచి దానిని 200 శాతానికి పెంచుతామని వెల్లడించారు. అమెరికాలోనే ఔషధ తయారీని పెంచడం, విదేశీ కంపెనీలు అక్కడే ఉత్పత్తి యూనిట్లు ఏర్పాటు చేసుకునేలా ప్రోత్సహించడమే ఈ నిర్ణయం వెనుక ప్రధాన ఉద్దేశమని ట్రంప్ పేర్కొన్నారు. అమెరికా ప్రపంచంలోనే అతిపెద్ద జనరిక్ ఔషధ మార్కెట్లలో ఒకటి. ఈ మార్కెట్‌కు భారత్ ప్రధాన సరఫరాదారుల్లో ఒకటిగా ఉంది. దీంతో కొత్త టారిఫ్ విధానం భారత ఫార్మా కంపెనీల ఎగుమతులపై ప్రభావం చూపే అవకాశం ఉందని పరిశ్రమ వర్గాలు భావిస్తున్నాయి. అయితే రెండేళ్ల సమయం లభించడం వల్ల కంపెనీలు తమ వ్యాపార, పెట్టుబడి, ఉత్పత్తి వ్యూహాలను మార్చుకునే అవకాశం ఉంటుంది. అయితే ఈ టారిఫ్‌ల అమలు విధానం, మినహాయింపులు, వర్తించే ఉత్పత్తులపై అమెరికా ప్రభుత్వం నుంచి మరిన్ని అధికారిక మార్గదర్శకాలు వెలువడాల్సి ఉంది. తుది ప్రభావం ఆ వివరాలపై ఆధారపడి ఉంటుంది.