పొగాకు రైతులకు గిట్టుబాటు ధరల కోసం ప్రభుత్వం చర్యలు: అచ్చెన్నాయుడు

ఎఫ్‌సీవీ పొగాకు మార్కెట్‌లో పరిస్థితులు క్రమంగా మెరుగుపడుతున్నాయని ఆంధ్రప్రదేశ్ వ్యవసాయ శాఖ మంత్రి అచ్చెన్నాయుడు తెలిపారు. పొగాకు రైతులకు గిట్టుబాటు ధరలు లభించేలా ప్రభుత్వం నిరంతరం చర్యలు తీసుకుంటోందని వెల్లడించారు. ముఖ్యమంత్రి చంద్రబాబు నాయుడు ఆదేశాల మేరకు రాష్ట్రంలోని పొగాకు వేలం కేంద్రాలపై నిరంతర పర్యవేక్షణ కొనసాగుతోందని మంత్రి పేర్కొన్నారు. ఇప్పటివరకు 132 వేలం రోజుల్లో 86.59 మిలియన్ కిలోల పొగాకు విక్రయం జరిగినట్లు అచ్చెన్నాయుడు తెలిపారు. ప్రస్తుతం పొగాకు కిలోకు సగటున రూ.209.83 ధర పలుకుతోందన్నారు. అధిక ఉత్పత్తి కారణంగా తొలుత మార్కెట్‌పై ఒత్తిడి ఏర్పడినప్పటికీ, ప్రస్తుతం కొనుగోలుదారుల మధ్య పోటీ పెరుగుతుండటంతో ధరలు మెరుగుపడుతున్నాయని వివరించారు. ‘నో-బిడ్’ బేల్స్ శాతం కూడా తగ్గుతున్నట్లు మంత్రి తెలిపారు. ప్రస్తుతం నో-బిడ్ బేల్స్ 11 నుంచి 12 శాతానికి తగ్గాయని, కొన్ని వేలం కేంద్రాల్లో అవి కేవలం 1 నుంచి 2 శాతం మాత్రమే ఉన్నాయని చెప్పారు. కొనుగోలుదారుల పోటీ పెరగడం వల్ల రైతులకు లభించే ధరల్లో మెరుగుదల కనిపిస్తోందన్నారు. ప్రతి వారం సుమారు 10 మిలియన్ కిలోల పొగాకు విక్రయం జరుగుతోందని మంత్రి వెల్లడించారు. ఎన్ఎల్ఎస్ ప్రాంతంలో కిలోకు గరిష్ఠంగా రూ.329 వరకు ధర లభిస్తోందని తెలిపారు. అలాగే ఎస్‌ఎల్‌ఎస్ ప్రాంతంలో రూ.255, ఎస్‌బీఎస్ ప్రాంతంలో రూ.252 వరకు గరిష్ఠ బిడ్లు నమోదవుతున్నాయని పేర్కొన్నారు. వేలం కేంద్రాల్లో రైతులు ఎదుర్కొంటున్న సమస్యలను పరిష్కరించేందుకు అధికారులు క్షేత్రస్థాయిలో పర్యటిస్తున్నారని అచ్చెన్నాయుడు చెప్పారు. సమస్యలను త్వరితగతిన పరిష్కరించి వేలం ప్రక్రియ సజావుగా కొనసాగేలా చర్యలు తీసుకుంటున్నట్లు తెలిపారు. 2026-27 సంవత్సరానికి ఎఫ్‌సీవీ పొగాకు పంట పరిమాణాన్ని 142 మిలియన్ కిలోల నుంచి 81 మిలియన్ కిలోలకు తగ్గించినట్లు మంత్రి వెల్లడించారు. మార్కెట్ డిమాండ్‌కు అనుగుణంగా పొగాకు ఉత్పత్తిని నియంత్రించడమే ప్రభుత్వ ప్రధాన లక్ష్యమని స్పష్టం చేశారు. రైతులు టొబాకో బోర్డు అనుమతించిన మేరకే పొగాకు సాగు చేయాలని అవగాహన కల్పించినట్లు తెలిపారు. పొగాకు వేలం పూర్తయ్యే వరకు రైతులకు ప్రభుత్వం పూర్తి సహకారం అందిస్తుందని మంత్రి హామీ ఇచ్చారు. రైతులకు మెరుగైన ధరలు లభించేలా వేలం కేంద్రాల పరిస్థితులను ఎప్పటికప్పుడు పర్యవేక్షిస్తూ, అవసరమైన చర్యలు తీసుకుంటామని అచ్చెన్నాయుడు తెలిపారు.