కేతన్ హత్య కేసు.. 2004 కాల్స్, ఆన్‌లైన్ సెర్చ్‌తో బయటపడిన కుట్ర

పుణెలో సంచలనం సృష్టించిన యువ వ్యాపారవేత్త కేతన్ అగర్వాల్ హత్య కేసులో పోలీసులు దర్యాప్తును మరింత వేగవంతం చేశారు. ఈ కేసులో నిందితులుగా ఉన్న సియా గోయల్, చేతన్ చౌదరీలను విచారిస్తున్న అధికారులు కీలక డిజిటల్ ఆధారాలను సేకరించారు. హత్యకు ముందే ఇద్దరూ ప్రణాళికాబద్ధంగా వ్యవహరించినట్లు దర్యాప్తులో తేలిందని పోలీసులు వెల్లడించారు. పోలీసుల సమాచారం ప్రకారం నిందితులు హత్యకు ముందు ఇంటర్నెట్‌లో పలు హత్య పద్ధతులపై సెర్చ్ చేశారు. అనంతరం జూన్ 18న లోహగడ్ కోట ప్రాంతానికి కేతన్‌ను తీసుకెళ్లి లోయలోకి తోసివేసి హత్య చేసినట్లు విచారణలో గుర్తించారు. ఫోరెన్సిక్ విశ్లేషణలో జనవరి నుంచి జూన్ వరకు నిందితులు మొత్తం 2004 ఫోన్ కాల్స్ చేసుకున్నట్లు బయటపడింది. ఈ కాలంలో వారు 238 గంటల పాటు ఫోన్, వాట్సాప్, ఫేస్‌టైమ్ ద్వారా మాట్లాడినట్లు పోలీసులు తెలిపారు. ఈ కమ్యూనికేషన్ రికార్డులు హత్య కుట్రను నిరూపించే కీలక ఆధారాలుగా మారాయి. పుణె ఎస్పీ సందీప్ సింగ్ గిల్ మాట్లాడుతూ, హత్య జరిగిన రోజు లోహగడ్ కోటకు వెళ్లేముందు నిందితులు ఒక కేఫ్‌లో సమావేశమై ప్రణాళికపై చర్చించినట్లు తెలిపారు. కాల్ డేటా, ఇంటర్నెట్ సెర్చ్ హిస్టరీ, డిజిటల్ ఫుట్‌ప్రింట్ల ఆధారంగా హత్య ముందే పక్కా ప్రణాళికతో జరిగినట్లు స్పష్టమవుతోందన్నారు. ప్రస్తుతం పోలీసులు సేకరించిన అన్ని సాంకేతిక ఆధారాలను విశ్లేషిస్తున్నారు. డిజిటల్ రికార్డులు, కమ్యూనికేషన్ వివరాలు, ఇతర ఫోరెన్సిక్ ఆధారాలు కేసు విచారణలో ప్రధాన పాత్ర పోషిస్తున్నాయని అధికారులు పేర్కొన్నారు. కేసుకు సంబంధించిన దర్యాప్తు కొనసాగుతోంది.