బెంగళూరు త్రిపుల్ మర్డర్ కేసు.. పుదుచ్చేరిలో శ్వేత అరెస్ట్

బెంగళూరులో సంచలనం సృష్టించిన కేఆర్ పురం త్రిపుల్ మర్డర్ కేసులో పోలీసులు కీలక పురోగతి సాధించారు. ప్రధాన నిందితురాలు శ్వేతను పుదుచ్చేరి రైల్వే స్టేషన్‌లో అరెస్ట్ చేయగా, మరో నిందితుడు కెనెత్ కోసం గాలింపు కొనసాగుతోంది. నగర పోలీసులు ఈ కేసు విచారణ కోసం ప్రత్యేక బృందాలను ఏర్పాటు చేశారు. ప్రాథమిక విచారణలో శ్వేత తన జీవితంపై కుటుంబ సభ్యుల నియంత్రణ, వ్యక్తిగత స్వేచ్ఛ లేకపోవడం వల్లే ఈ నిర్ణయం తీసుకున్నట్లు చెప్పినట్లు పోలీసులు వెల్లడించారు. అయితే ఈ వాంగ్మూలంతో పాటు ఇతర సాక్ష్యాలను కూడా అధికారులు పరిశీలిస్తున్నారు. ఘటనాస్థలంలో స్వాధీనం చేసుకున్న వ్యక్తిగత డైరీలో ఆమె భావోద్వేగాలు, ఒంటరితనం, మానసిక ఒత్తిడిని ప్రతిబింబించే పలు వాక్యాలు ఉన్నట్లు పోలీసులు గుర్తించారు. డైరీలోని అంశాలు కేసు దర్యాప్తులో ఒక కోణంగా పరిశీలిస్తున్నట్లు తెలిపారు. దర్యాప్తులో శ్వేత, కెనెత్ ఇంజినీరింగ్ చదువుతున్న సమయంలో పరిచయం ఏర్పడి, తర్వాత సహజీవనం ప్రారంభించినట్లు తెలిసింది. ఇటీవల వ్యాపారం కోసం రూ.30 లక్షల రుణం తీసుకున్నట్లు కూడా విచారణలో వెలుగులోకి వచ్చింది. రుణ చెల్లింపుల సమస్యలతో కుటుంబంలో విభేదాలు మరింత పెరిగినట్లు సమాచారం. ఘటన జరిగిన రోజు కుటుంబ సభ్యులు శ్వేత నివాసానికి వెళ్లగా వాగ్వాదం జరిగిందని, అనంతరం ముగ్గురిపై కత్తులతో దాడి జరిగినట్లు పోలీసులు ప్రాథమికంగా గుర్తించారు. దాడి అనంతరం ఇద్దరూ పరారయ్యారని, తర్వాత విడిపోయి వేర్వేరు ప్రాంతాల్లో సంచరించినట్లు విచారణలో తేలింది. ప్రస్తుతం పరారీలో ఉన్న కెనెత్‌ను పట్టుకునేందుకు పోలీసులు ముమ్మరంగా గాలిస్తున్నారు. ఫోరెన్సిక్ ఆధారాలు, సీసీటీవీ దృశ్యాలు, ఇతర సాంకేతిక సమాచారం ఆధారంగా దర్యాప్తు కొనసాగుతోంది.