ఛాంపియన్స్ ట్రోఫీ: శ్రీలంక ఆతిథ్య హక్కులు తొలగించిన ఐసీసీ

2027లో తొలిసారి నిర్వహించనున్న మహిళల ఛాంపియన్స్ ట్రోఫీకి శ్రీలంక ఆతిథ్య హక్కులను అంతర్జాతీయ క్రికెట్ మండలి (ఐసీసీ) తొలగించింది. ఫిబ్రవరి 14 నుంచి 28 వరకు శ్రీలంకలో జరగాల్సిన ఈ టోర్నీ ఇక అక్కడ నిర్వహించబడదు. పోటీలను ప్రత్యామ్నాయ వేదికకు తరలించాలని ఐసీసీ నిర్ణయించింది. అయితే టోర్నీని ఏ దేశంలో నిర్వహించాలనే విషయంపై ఇంకా తుది నిర్ణయం తీసుకోలేదు. తదుపరి ఐసీసీ బోర్డు సమావేశంలో కొత్త వేదికపై స్పష్టత వచ్చే అవకాశం ఉంది. శ్రీలంక క్రికెట్ (ఎస్‌ఎల్‌సీ) వ్యవహారాల్లో ప్రభుత్వ జోక్యంపై ఐసీసీ కొంతకాలంగా అభ్యంతరాలు వ్యక్తం చేస్తోంది. ప్రస్తుతం ప్రభుత్వం నియమించిన ట్రాన్స్‌ఫర్మేషన్ కమిటీ ఎస్‌ఎల్‌సీ వ్యవహారాలను నిర్వహిస్తోంది. అయితే ఐసీసీ నిబంధనల ప్రకారం సభ్య దేశాల క్రికెట్ బోర్డులు ప్రభుత్వ జోక్యం లేకుండా స్వతంత్రంగా పనిచేయాలి. ఈ నేపథ్యంలోనే శ్రీలంకకు టోర్నీ ఆతిథ్య హక్కులు దూరమైనట్లు తెలుస్తోంది. శ్రీలంకకు ఐసీసీ టోర్నీ ఆతిథ్యం చేజారడం ఇదే మొదటిసారి కాదు. 2023లో ప్రభుత్వ జోక్యం ఆరోపణల నేపథ్యంలో ఐసీసీ శ్రీలంక క్రికెట్‌ను సస్పెండ్ చేసింది. ఆ తర్వాత 2024 పురుషుల అండర్-19 ప్రపంచకప్ ఆతిథ్య హక్కులను కూడా శ్రీలంక కోల్పోయింది. ఆ టోర్నీని దక్షిణాఫ్రికాలో నిర్వహించారు. 2027 మహిళల ఛాంపియన్స్ ట్రోఫీలో ఆరు జట్లు పాల్గొనాల్సి ఉంది. తొలుత ర్యాంకింగ్స్‌లో ముందున్న జట్లతో పాటు ఆతిథ్య దేశానికి కూడా అవకాశం కల్పించేలా అర్హత విధానం రూపొందించారు. ప్రస్తుతం శ్రీలంక ర్యాంకింగ్స్‌లో ఆరో స్థానంలో ఉంది. ఇప్పుడు ఆతిథ్య హక్కులు మరో దేశానికి దక్కడంతో శ్రీలంక ఈ టోర్నీలో ఆడుతుందా లేదా అనే అంశం ఆసక్తికరంగా మారింది. కొత్త ఆతిథ్య దేశం ర్యాంకింగ్స్ ఆధారంగా అర్హత పొందని జట్టు అయితే, అర్హత నిబంధనల్లో మార్పులు చేయాల్సి రావచ్చు. ఈ అంశంపై కూడా ఐసీసీ స్పష్టత ఇవ్వాల్సి ఉంది. అయితే ఇప్పటివరకు కొత్త అర్హత విధానాన్ని ఐసీసీ ప్రకటించలేదు. తదుపరి బోర్డు సమావేశం తర్వాత టోర్నీ వేదిక, జట్ల అర్హతపై మరింత స్పష్టత వచ్చే అవకాశం ఉంది.