గలగలా గోదారి!.. ఉత్తరాంధ్రకు గోదావరి జలాలు విడుదల

ఉత్తరాంధ్ర ప్రజల దశాబ్దాల కల సాకారమయ్యే దిశగా మరో కీలక అడుగు పడింది. పోలవరం ఎడమ ప్రధాన కాలువ ద్వారా గోదావరి జలాలు అనకాపల్లి జిల్లాకు చేరాయి. పాయకరావుపేట మండలం పీఎల్‌ పురం గ్రామంలోని క్రాస్‌ రెగ్యులేటర్‌ వద్ద ముఖ్యమంత్రి చంద్రబాబు నాయుడు గోదావరి జలాలను విడుదల చేశారు. ఈ సందర్భంగా ప్రత్యేక పూజలు నిర్వహించి, జలహారతి ఇచ్చారు. గోదారమ్మకు సాష్టాంగ నమస్కారం చేసి నీటిని ఉత్తరాంధ్రలోకి ఆహ్వానించారు. రాష్ట్రంలోని ప్రధాన నదులను అనుసంధానించి ప్రతి ప్రాంతానికీ నీటిని అందించాలన్నది తన లక్ష్యమని సీఎం చంద్రబాబు తెలిపారు. గోదావరి, కృష్ణా నదుల జలాలను సమర్థంగా వినియోగించుకోవడం ద్వారా రాష్ట్రంలో సాగు, తాగునీరు, పరిశ్రమలు, ఉపాధి రంగాలకు కొత్త అవకాశాలు ఏర్పడతాయని చెప్పారు. పోలవరం ఎడమ కాలువ ద్వారా వస్తున్న గోదావరి నీటితో సుమారు 4 లక్షల ఎకరాలకు సాగునీరు అందుతుందని సీఎం వివరించారు. ఇందులో తూర్పుగోదావరి, కాకినాడ, కోనసీమ, అనకాపల్లి జిల్లాల్లోని వివిధ ప్రాంతాలకు నీటిని అందించనున్నట్లు తెలిపారు. అలాగే సుమారు 9 లక్షల మందికి తాగునీటి ప్రయోజనం కలుగుతుందని చెప్పారు. విశాఖపట్నంలోని పరిశ్రమలకు 23 టీఎంసీల నీటిని అందించే ప్రణాళిక ఉందన్నారు. గోదావరి జలాలను ఉత్తరాంధ్రకు తీసుకురావడం అంత సులభంగా జరగలేదని చంద్రబాబు పేర్కొన్నారు. కాలువ నిర్మాణంలో అనేక సాంకేతిక, భూసేకరణ, నిర్వాసితుల సమస్యలను ఎదుర్కొన్నామని చెప్పారు. ఏలేరు సైఫన్‌, పాంపా, తాండవ, వరహా నదులపై అక్విడెక్ట్‌లు నిర్మించడం, కొండ ప్రాంతాల్లో కాలువల తవ్వకం, అవసరమైన చోట్ల ప్రత్యేక నిర్మాణాలు చేపట్టడం ద్వారా నీటిని ముందుకు తీసుకొచ్చామని వివరించారు. ఎడమ కాలువ నిర్మాణానికి ఇప్పటివరకు రూ.4,192 కోట్లు ఖర్చు చేసినట్లు సీఎం తెలిపారు. కాలువను మరింత విస్తరించి ఉత్తరాంధ్ర సుజల స్రవంతి ప్రాజెక్టుతో అనుసంధానించనున్నట్లు చెప్పారు. మరో రూ.3,200 కోట్లతో ఉత్తరాంధ్రలోని 12 ప్రాజెక్టులను 2028 నాటికి పూర్తి చేసి ప్రజలకు అంకితం చేయాలనే లక్ష్యాన్ని వెల్లడించారు. ఉత్తరాంధ్రకు నీరు అందడం కేవలం సాగునీటి ప్రయోజనానికే పరిమితం కాదని సీఎం అన్నారు. నీరు అందుబాటులో ఉంటే వ్యవసాయం అభివృద్ధి చెందడంతో పాటు పరిశ్రమలు ఏర్పాటవుతాయని, ఉద్యోగ అవకాశాలు పెరుగుతాయని తెలిపారు. భవిష్యత్తులో ఉత్తరాంధ్ర నుంచి ప్రజలు వలస వెళ్లే పరిస్థితి కాకుండా ఇతర ప్రాంతాల నుంచి ఉత్తరాంధ్రకు ప్రజలు వచ్చే స్థాయిలో అభివృద్ధి సాధించాలని తన విజన్‌గా పేర్కొన్నారు. విశాఖపట్నం నగరాన్ని పరిశ్రమలు, ఐటీ, కృత్రిమ మేధస్సు, డేటా సెంటర్లకు కేంద్రంగా అభివృద్ధి చేయాలని ప్రభుత్వం భావిస్తోందని చంద్రబాబు చెప్పారు. ప్రముఖ ఐటీ సంస్థలు రావడం, సముద్ర కేబుల్‌ కనెక్టివిటీ, రహదారులు, రైల్వేలు, పోర్టులు వంటి మౌలిక వసతుల అభివృద్ధితో విశాఖకు మరిన్ని అవకాశాలు వస్తాయని అన్నారు. పోలవరం ప్రాజెక్టు విషయంలో 2014లో అధికారంలోకి వచ్చినప్పటి నుంచి ప్రత్యేక దృష్టి పెట్టినట్లు సీఎం గుర్తుచేశారు. రాష్ట్ర విభజన సమయంలో తెలంగాణలో ఉన్న ఏడు మండలాలను ఆంధ్రప్రదేశ్‌లో కలపడం ప్రాజెక్టు నిర్మాణానికి కీలకమైందని తెలిపారు. ఇందుకు కేంద్ర ప్రభుత్వం సహకరించిందని పేర్కొన్నారు. గోదావరి జలాలు ఉత్తరాంధ్రలోకి రావడం పట్ల స్థానిక రైతులు, ప్రజలు ఆనందం వ్యక్తం చేశారు. తమ ప్రాంతంలోని మెట్ట భూములు సాగుకు అనుకూలంగా మారతాయని, తాగునీటి సమస్యలు తగ్గుతాయని ఆశాభావం వ్యక్తం చేశారు. దశాబ్దాలుగా ఎదురుచూస్తున్న నీటి కల నెరవేరిందని పలువురు పేర్కొన్నారు. గోదావరి జలాల విడుదలతో ఉత్తరాంధ్రలో వ్యవసాయం, తాగునీరు, పరిశ్రమలు, ఉపాధి రంగాల్లో కొత్త అవకాశాలకు మార్గం ఏర్పడుతుందనే ఆశలు వ్యక్తమవుతున్నాయి. గోదావరి జలాలను మరింత ఉత్తరాంధ్ర ప్రాంతాలకు తీసుకెళ్లి వంశధారతో అనుసంధానించాలనే ప్రభుత్వ ప్రణాళికలు అమలైతే ఈ ప్రాంతంలో నీటి లభ్యత మరింత మెరుగుపడే అవకాశం ఉంది. “జలం ఉంటే జీవం, జీవితం.. నీరు ఉంటేనే సాగు, బాగు” అంటూ సీఎం చేసిన వ్యాఖ్యలు ఈ ప్రాజెక్టు ప్రాధాన్యతను తెలియజేస్తున్నాయి. పోలవరం ఎడమ కాలువ ద్వారా గోదావరి నీరు ఉత్తరాంధ్రలోకి చేరడం ఈ ప్రాంత అభివృద్ధిలో కీలక ఘట్టంగా నిలిచింది.