తుమ్మిడిహెట్టి బ్యారేజీపై సెప్టెంబరు 1న ఢిల్లీలో కీలక సమావేశం
తుమ్మిడిహెట్టి బ్యారేజీ నిర్మాణానికి సంబంధించిన సాంకేతిక, అంతర్రాష్ట్ర అంశాలపై సెప్టెంబరు 1న ఢిల్లీలో కీలక సమావేశం జరగనుంది. కేంద్ర జల వనరుల సంఘం చైర్మన్ అధ్యక్షతన జరిగే ఈ సమావేశంలో తెలంగాణ, మహారాష్ట్ర జలవనరుల శాఖల ఉన్నతాధికారులు పాల్గొంటారు. 148 మీటర్లకు బదులుగా 150 మీటర్ల ఎత్తుతో బ్యారేజీ నిర్మించేందుకు తెలంగాణ ప్రభుత్వం ప్రయత్నిస్తోంది. 150 మీటర్ల ఎత్తుతో నిర్మిస్తే గ్రావిటీ ద్వారా నీటిని తరలించే అవకాశం ఉంటుందని ప్రభుత్వం కేంద్రానికి వివరించింది. ఈ సమావేశానికి ముందు సీఎం రేవంత్రెడ్డి, మంత్రి ఉత్తమ్కుమార్రెడ్డి ప్రాజెక్టుపై సమీక్ష నిర్వహించనున్నారు.
తుమ్మిడిహెట్టి బ్యారేజీ నిర్మాణానికి సంబంధించిన సాంకేతిక, అంతర్రాష్ట్ర అంశాలపై సెప్టెంబరు 1న ఢిల్లీలో కీలక సమావేశం జరగనుంది. కేంద్ర జల వనరుల సంఘం (సీడబ్ల్యూసీ) చైర్మన్ అధ్యక్షతన ఉదయం 11 గంటలకు సేవా భవన్లో ఈ సమావేశం నిర్వహించనున్నారు. తెలంగాణ, మహారాష్ట్ర రాష్ట్రాల జలవనరుల శాఖలకు చెందిన ఉన్నతాధికారులు ఈ సమావేశంలో పాల్గొననున్నారు. తుమ్మిడిహెట్టి ప్రాజెక్టుకు సంబంధించిన పెండింగ్ అంశాలపై ఈ భేటీలో చర్చించే అవకాశం ఉంది.
ముఖ్యంగా బ్యారేజీ ఎత్తు విషయంలో తెలంగాణ ప్రభుత్వం కీలక ప్రతిపాదనను ముందుకు తీసుకెళ్తోంది. మహారాష్ట్ర గతంలో అంగీకరించిన 148 మీటర్ల ఎత్తుకు బదులుగా 150 మీటర్ల ఎత్తుతో బ్యారేజీని నిర్మించాలని తెలంగాణ ప్రభుత్వం కోరుతోంది. 148 మీటర్ల ఎత్తుతో బ్యారేజీ నిర్మిస్తే నీటిని మళ్లీ పంపింగ్ చేయాల్సిన పరిస్థితి ఏర్పడుతుందని రాష్ట్ర ప్రభుత్వం కేంద్రానికి వివరించింది. అదే 150 మీటర్ల ఎత్తుతో బ్యారేజీ నిర్మిస్తే గ్రావిటీ ద్వారా నీటిని తరలించే అవకాశం ఉంటుందని పేర్కొంది.
150 మీటర్ల ఎత్తుతో బ్యారేజీ నిర్మాణం వల్ల అదనపు ముంపు ఎంతవరకు ఉంటుందనే అంశం కూడా కీలకంగా మారింది. కేంద్ర నీటి, విద్యుత్ పరిశోధన కేంద్రం (సీడబ్ల్యూఆర్పీఎస్) అధ్యయనాల ప్రకారం 150 మీటర్ల ఎత్తుతో బ్యారేజీ నిర్మించినప్పటికీ అదనపు ముంపు పరిమితంగానే ఉంటుందని తెలంగాణ ప్రభుత్వం కేంద్రం దృష్టికి తీసుకెళ్లింది. దీంతో సాంకేతిక అంశాలతో పాటు మహారాష్ట్రతో ఉన్న అంతర్రాష్ట్ర అంశాలపై కూడా సెప్టెంబరు 1న జరిగే సమావేశంలో చర్చ జరగనుంది.
తుమ్మిడిహెట్టి ప్రాజెక్టును త్వరగా కార్యరూపంలోకి తీసుకురావాలనే లక్ష్యంతో తెలంగాణ ప్రభుత్వం కేంద్రంతో పాటు మహారాష్ట్ర అధికారులతో వరుసగా సంప్రదింపులు జరుపుతోంది. ప్రాజెక్టు అమలుకు అవసరమైన అనుమతులు, సాంకేతిక అంశాలు, నీటి లభ్యత వంటి విషయాలపై ప్రభుత్వం దృష్టి సారిస్తోంది. కేంద్రం, మహారాష్ట్రతో చర్చల ద్వారా సమస్యలకు పరిష్కారం కనుగొని ప్రాజెక్టును ముందుకు తీసుకెళ్లేందుకు ప్రయత్నాలు కొనసాగుతున్నాయి.
ఈ నేపథ్యంలో సీఎం రేవంత్రెడ్డి, నీటిపారుదల శాఖ మంత్రి ఉత్తమ్కుమార్రెడ్డి తుమ్మిడిహెట్టి బ్యారేజీపై సమీక్ష నిర్వహించనున్నారు. నీటి లభ్యతతో పాటు ప్రాజెక్టుకు సంబంధించిన ఇతర అంశాలను అధికారులు సీఎం, మంత్రికి వివరించనున్నారు. అనంతరం ఢిల్లీలో జరిగే కీలక సమావేశంలో తెలంగాణ ప్రభుత్వం అనుసరించాల్సిన విధానంపై అధికారులకు దిశానిర్దేశం చేయనున్నారు.
అలాగే కృష్ణా ట్రైబ్యునల్లో అనుసరించాల్సిన అంశాలపై కూడా సీఎం రేవంత్రెడ్డి న్యాయవాదులతో చర్చించనున్నారు. సుప్రీంకోర్టు సీనియర్ న్యాయవాది సీఎస్ వైద్యనాథన్తో పాటు ఇతర న్యాయవాదులతో సమావేశమై సంబంధిత న్యాయపరమైన అంశాలపై చర్చించనున్నారు. తుమ్మిడిహెట్టి బ్యారేజీ ప్రాజెక్టును వేగంగా ముందుకు తీసుకెళ్లేందుకు ప్రభుత్వం సాంకేతిక, పరిపాలనా, అంతర్రాష్ట్ర, న్యాయపరమైన అంశాలపై సమన్వయంతో చర్యలు చేపడుతోంది.
Related Stories
