నో ఎగ్జామ్.. అప్లై చేస్తే చాలు.. పోస్టల్ శాఖలో భారీగా ఉద్యోగాలు

పోస్టల్ శాఖలో ప్రభుత్వ ఉద్యోగం కోసం ఎదురుచూస్తున్న అభ్యర్థులకు ఇది మంచి అవకాశం. దేశవ్యాప్తంగా వివిధ పోస్టల్ సర్కిళ్లలో గ్రామీణ డాక్ సేవక్ (GDS) పోస్టులను భర్తీ చేయడానికి నోటిఫికేషన్ విడుదలైంది. ఈ నియామక ప్రక్రియలో బ్రాంచ్ పోస్ట్ మాస్టర్ (BPM), అసిస్టెంట్ బ్రాంచ్ పోస్ట్ మాస్టర్ (ABPM), డాక్ సేవక్ పోస్టులు ఉన్నాయి. ఈ ఉద్యోగాలకు ఎలాంటి రాత పరీక్ష నిర్వహించరు. 10వ తరగతిలో అభ్యర్థులు సాధించిన మార్కుల ఆధారంగా ఎంపిక ప్రక్రియ చేపడతారు. ముఖ్యంగా మ్యాథ్స్, ఇంగ్లీష్, స్థానిక భాషలో సాధించిన మార్కులను పరిశీలిస్తారు. అభ్యర్థులకు కంప్యూటర్ పరిజ్ఞానం ఉండటంతో పాటు సైకిల్ తొక్కడం కూడా తెలిసి ఉండాలి. ఆగస్టు 31 నుంచి సెప్టెంబర్ 19 వరకు వన్‌టైమ్ రిజిస్ట్రేషన్ చేసుకునే అవకాశం ఉంది. సెప్టెంబర్ 2 నుంచి 21 వరకు ఆన్‌లైన్ దరఖాస్తులు సమర్పించవచ్చు. దరఖాస్తుల్లో పొరపాట్లను సెప్టెంబర్ 23, 24 తేదీల్లో సరిచేసుకునే అవకాశం కల్పించారు. సాధారణ దరఖాస్తుదారులకు ఫీజు రూ.100 కాగా, మహిళలు, ఎస్సీ, ఎస్టీ, దివ్యాంగులకు ఫీజు మినహాయింపు ఉంది. బ్రాంచ్ పోస్ట్ మాస్టర్ పోస్టుకు నెలకు రూ.12,000 నుంచి రూ.29,380 వరకు, అసిస్టెంట్ బ్రాంచ్ పోస్ట్ మాస్టర్/డాక్ సేవక్ పోస్టులకు రూ.10,000 నుంచి రూ.24,470 వరకు వేతనం నిర్ణయించారు. దరఖాస్తుదారుల వయస్సు 18 నుంచి 40 సంవత్సరాల మధ్య ఉండాలి. ఎస్సీ, ఎస్టీ, ఓబీసీ, దివ్యాంగ అభ్యర్థులకు నిబంధనల ప్రకారం వయోపరిమితిలో సడలింపు ఉంటుంది. తెలుగు రాష్ట్రాల్లో కూడా పెద్ద సంఖ్యలో ఖాళీలు ఉన్నాయి. ఆంధ్రప్రదేశ్‌లో 918, తెలంగాణలో 419 పోస్టులను భర్తీ చేస్తున్నట్లు సమాచారం. ఎంపికైన వారు రోజుకు నాలుగు గంటల పాటు పనిచేయాల్సి ఉంటుందని కథనంలో పేర్కొన్నారు. పోస్టల్ సేవలతో పాటు ఇండియా పోస్ట్ పేమెంట్స్ బ్యాంక్ సేవలకు సంబంధించిన పనులకు BPM, ABPM, డాక్ సేవక్‌లకు అదనపు ప్రోత్సాహకాలు కూడా అందించనున్నట్లు సమాచారం.