స్కూల్ బస్సు కింద పడి రెండేళ్ల చిన్నారి మృతి.. కుటుంబంలో విషాదం

సంగారెడ్డి జిల్లా సదాశివపేటలోని సిద్ధాపూర్ కాలనీలో తీవ్ర విషాద ఘటన చోటుచేసుకుంది. ప్రైవేట్ పాఠశాల బస్సు కింద పడి రెండేళ్ల చిన్నారి ఎఫ్రాయిమ్ మృతి చెందాడు. ఈ ఘటన స్థానికంగా విషాదాన్ని నింపింది. పోలీసులు తెలిపిన వివరాల ప్రకారం.. మంగళవారం సాయంత్రం పాఠశాల సమయం ముగిసిన అనంతరం విద్యార్థులను వారి ఇళ్ల వద్ద దింపేందుకు స్కూల్ బస్సు బయలుదేరింది. ఈ క్రమంలో బస్సు సిద్ధాపూర్ కాలనీకి చేరుకుంది. బస్సు రాగానే చిన్నారి ఎఫ్రాయిమ్ తన అన్నయ్యను ఇంటికి తీసుకెళ్లేందుకు రోడ్డుపైకి వెళ్లాడు. అయితే అనుకోకుండా చిన్నారి బస్సు టైర్ కింద పడటంతో తీవ్ర గాయాలయ్యాయి. ప్రమాదం జరిగిన వెంటనే చిన్నారి కుటుంబ సభ్యులు బయటకు వచ్చి చూడగా అప్పటికే అతడు మృతి చెందాడు. కుమారుడిని కోల్పోయిన తల్లిదండ్రులు కన్నీరుమున్నీరుగా విలపించారు. సమాచారం అందుకున్న పోలీసులు సిద్ధాపూర్‌కు చేరుకుని ప్రమాద స్థలాన్ని పరిశీలించారు. కుటుంబ సభ్యులు, స్థానికులను విచారించి వివరాలు సేకరించారు. ఘటనపై కేసు నమోదు చేసి దర్యాప్తు ప్రారంభించారు. చిన్నారి మృతితో సదాశివపేటలో విషాద ఛాయలు అలుముకున్నాయి. ఈ ఘటన స్థానికులను తీవ్రంగా కలచివేసింది.