గ్రామీణ ఉపాధికి కొత్త దిశ.. నేడు వికసిత్ భారత్ గ్యారంటీ పథకం ప్రారంభం

దేశంలోని గ్రామీణ ఉపాధి వ్యవస్థలో అత్యంత కీలక సంస్కరణగా భావిస్తున్న వికసిత్ భారత్ గ్యారంటీ ఫర్ రోజ్‌గార్ అండ్ అజీవికా మిషన్ (గ్రామీణ్) పథకాన్ని గురువారం ఆంధ్రప్రదేశ్‌లోని అన్నమయ్య జిల్లా రైల్వే కోడూరు నియోజకవర్గం ముక్కవారిపల్లిలో జాతీయ స్థాయిలో ప్రారంభించనున్నారు. 2006 నుంచి అమల్లో ఉన్న మహాత్మా గాంధీ జాతీయ గ్రామీణ ఉపాధి హామీ పథకం (MGNREGS) స్థానంలో ఈ కొత్త పథకం అమల్లోకి వస్తోంది. ఈ ప్రారంభోత్సవ కార్యక్రమంలో ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్, కేంద్ర గ్రామీణాభివృద్ధి మంత్రి శివరాజ్ సింగ్ చౌహాన్, కేంద్ర మంత్రి పెమ్మసాని చంద్రశేఖర్‌తో పాటు పలువురు ప్రజాప్రతినిధులు, అధికారులు పాల్గొననున్నారు. రాష్ట్రం నలుమూలల నుంచి సుమారు 25 వేల మంది ప్రజలు ఈ కార్యక్రమానికి హాజరవుతారని జిల్లా అధికారులు తెలిపారు. కొత్త పథకంలో గ్రామీణ కార్మికులకు కల్పించే ఉపాధి హామీని 100 రోజుల నుంచి 125 రోజులకు పెంచారు. ఉపాధి కోసం దరఖాస్తు చేసిన తర్వాత 15 రోజుల్లోపు పని కల్పించడం తప్పనిసరి చేశారు. ఒకవేళ నిర్ణీత గడువులో పని ఇవ్వలేకపోతే నిరుద్యోగ భృతి నేరుగా లబ్ధిదారుల బ్యాంకు ఖాతాలో జమ చేయనున్నారు. అలాగే మస్టర్ రోల్ ముగిసిన 15 రోజుల్లో వేతనాలు చెల్లించకపోతే ఆలస్యానికి ప్రత్యేక పరిహారం చెల్లించే నిబంధనను కూడా అమలు చేస్తున్నారు. ఈ పథకం కింద నీటి సంరక్షణ, జల వనరుల అభివృద్ధి, గ్రామీణ మౌలిక వసతులు, జీవనోపాధి మెరుగుదల, వాతావరణ మార్పులకు అనుగుణమైన అభివృద్ధి పనులకు ప్రాధాన్యం ఇవ్వనున్నారు. గ్రామ పంచాయతీలే పనుల ప్రణాళికలు రూపొందించి జాబ్ కార్డులను జారీ చేస్తాయి. పనుల ఎంపికలో స్థానిక అవసరాలకు అధిక ప్రాధాన్యం ఇవ్వనున్నారు. ఒంటరి మహిళలు, దివ్యాంగులు, 60 ఏళ్లు దాటిన వృద్ధులు, ట్రాన్స్‌జెండర్ వ్యక్తులు, విముక్తి పొందిన బానిస కార్మికులకు ప్రత్యేక ఉపాధి హామీ కార్డులు జారీ చేయనున్నారు. ఈ వర్గాలకు ఉపాధి అవకాశాలు మరింత సులభంగా అందేలా ప్రత్యేక విధానాలను అమలు చేయనున్నారు. గ్రామీణ సమాజంలో వెనుకబడిన వర్గాలకు ఈ పథకం మరింత భరోసా కల్పిస్తుందని కేంద్ర ప్రభుత్వం భావిస్తోంది. పారదర్శకతకు పెద్దపీట వేస్తూ ప్రతి ఆరు నెలలకు సామాజిక తనిఖీలు నిర్వహించనున్నారు. పనుల వివరాలు, మస్టర్ రోల్స్, కూలీల చెల్లింపులు ప్రజలకు అందుబాటులో ఉంచనున్నారు. ఫిర్యాదుల పరిష్కారం కోసం ఒంబుడ్స్‌పర్సన్ వ్యవస్థను కొనసాగించడంతో పాటు ప్రత్యేక గ్రీవెన్స్ రెడ్రెస్సల్ విధానాన్ని అమలు చేయనున్నారు. ఈ పునర్వ్యవస్థీకరణలో గ్రామీణ ఉపాధి పథకంలో పనిచేస్తున్న కంప్యూటర్ ఆపరేటర్లు, ఫీల్డ్ అసిస్టెంట్లు, అకౌంట్స్ అసిస్టెంట్లు, టెక్నికల్ అసిస్టెంట్లు, ఇంజినీరింగ్ కన్సల్టెంట్లు, అదనపు ప్రోగ్రామ్ అధికారుల బాధ్యతలను కూడా పునర్వ్యవస్థీకరించారు. వారికి సవరించిన హోదాలు, మెరుగైన ఉద్యోగ భద్రత కల్పించే చర్యలు తీసుకుంటున్నారు. ప్రారంభోత్సవ కార్యక్రమంలో ఆంధ్రప్రదేశ్ గ్రామీణ ఉపాధి రంగంలో సాధించిన విజయాలపై ప్రత్యేక ప్రదర్శనను ఏర్పాటు చేస్తున్నారు. అదే వేదికపై కొత్త VB-G RAM (Gramin) డిజిటల్ పోర్టల్‌ను ప్రారంభించనున్నారు. ఈ పోర్టల్ ద్వారా జాబ్ కార్డులు, పనుల వివరాలు, వేతన చెల్లింపులు, ఫిర్యాదుల పరిష్కారం వంటి సేవలను డిజిటల్ విధానంలో అందుబాటులోకి తీసుకురానున్నారు. గ్రామీణ ఉపాధి వ్యవస్థను మరింత పారదర్శకంగా, వేగవంతంగా, సాంకేతికంగా అభివృద్ధి చేయడంలో ఈ కొత్త పథకం కీలక మైలురాయిగా నిలుస్తుందని అధికారులు అభిప్రాయపడుతున్నారు.