అసోంలో వరదల బీభత్సం.. 16 వేల మంది ప్రభావితం

అసోంలోని ధేమాజీ జిల్లాలో భారీ వర్షాలు, వరదలు ప్రజలను తీవ్ర ఇబ్బందులకు గురిచేస్తున్నాయి. వరదల కారణంగా వేలాది మంది నిరాశ్రయులవగా, రైల్వే సేవలు కూడా తీవ్రంగా దెబ్బతిన్నాయి. పరిస్థితిని దృష్టిలో ఉంచుకుని రాష్ట్ర ప్రభుత్వం అత్యవసర సహాయక చర్యలను వేగవంతం చేసింది. అసోం రాష్ట్ర విపత్తు నిర్వహణ సంస్థ (ASDMA) వివరాల ప్రకారం, ధేమాజీ జిల్లాలోని నాలుగు రెవెన్యూ సర్కిళ్ల పరిధిలో ఉన్న 69 గ్రామాలు వరదలతో ప్రభావితమయ్యాయి. దాదాపు 16 వేల మంది ప్రజలు వరదల కారణంగా ఇబ్బందులు ఎదుర్కొంటున్నారు. అనేక ప్రాంతాల్లో రహదారులు నీటమునిగిపోవడంతో రాకపోకలు కూడా కష్టతరంగా మారాయి. భారీ వర్షాల కారణంగా నదీ తీరాలు కోతకు గురికావడంతో ఆర్చిపథర్-సిమెన్ చాపరి మధ్య ఉన్న రైల్వే వంతెనకు నష్టం వాటిల్లింది. దీంతో ఆ మార్గంలో రైళ్ల రాకపోకలను తదుపరి ఆదేశాలు వచ్చే వరకు నిలిపివేసినట్లు నార్త్ ఈస్ట్ ఫ్రాంటియర్ రైల్వే ప్రకటించింది. ఈ మార్గంలో ప్రయాణించే రైళ్లను సిలాపథర్ వరకు మాత్రమే నడుపుతున్నారు. ప్రయాణికుల సౌకర్యార్థం ముర్కోంగ్‌సెలెక్ నుంచి సిలాపథర్ వరకు ప్రత్యేక బస్సులు ఏర్పాటు చేశారు. ఈ సందర్భంగా అసోం ముఖ్యమంత్రి హిమంత బిశ్వ శర్మ సామాజిక మాధ్యమం ద్వారా స్పందించారు. వరద పరిస్థితిని నిరంతరం పర్యవేక్షిస్తున్నట్లు, బాధిత కుటుంబాల భద్రత, సహాయక చర్యలు, దీర్ఘకాలిక పునరావాసానికి ప్రభుత్వం అన్ని వనరులను సమీకరిస్తోందని తెలిపారు. జలవనరుల శాఖ మంత్రి సుసంత బోర్గోహైన్‌, రెవెన్యూ & విపత్తు నిర్వహణ శాఖ మంత్రి కేశబ్ మహంతాను ధేమాజీలోనే ఉండి సహాయక చర్యలను పర్యవేక్షించాలని ఆదేశించినట్లు వెల్లడించారు. దెబ్బతిన్న రైల్వే వంతెన 1965లో నిర్మించబడిందని, తర్వాత బ్రాడ్ గేజ్‌గా మార్చినట్లు రైల్వే అధికారులు తెలిపారు. వరదల కారణంగా నదీ తీరంలో భారీ కోత ఏర్పడి వంతెనకు మద్దతుగా ఉన్న స్తంభాల్లో ఒకటి అస్థిరంగా మారడంతో భద్రత దృష్ట్యా రైళ్ల రాకపోకలను నిలిపివేసినట్లు పేర్కొన్నారు. ప్రస్తుతం ప్రయాణికుల కోసం హెల్ప్‌డెస్క్‌లు ఏర్పాటు చేసి అవసరమైన సహాయం అందిస్తున్నట్లు అధికారులు తెలిపారు. రాష్ట్ర ప్రభుత్వం, రైల్వే శాఖ, జిల్లా యంత్రాంగం సంయుక్తంగా పరిస్థితిని నిరంతరం పర్యవేక్షిస్తూ సహాయక చర్యలను కొనసాగిస్తున్నాయి.