పుణె చిన్నారి హత్యాచారం కేసులో దోషికి మరణశిక్ష

మహారాష్ట్రలోని పుణెలో మూడేళ్ల చిన్నారిపై అత్యాచారం చేసి హత్య చేసిన కేసులో ప్రత్యేక కోర్టు సంచలన తీర్పు వెలువరించింది. ఈ కేసులో దోషిగా తేలిన 65 ఏళ్ల భీమ్‌రావ్‌కు మరణశిక్ష విధిస్తూ న్యాయస్థానం కీలక నిర్ణయం తీసుకుంది. ఈ నేరం అత్యంత క్రూరమైనదని, సమాజాన్ని కలచివేసే స్వభావం కలిగిందని కోర్టు వ్యాఖ్యానించింది. పోలీసుల దర్యాప్తు ప్రకారం, మే 1, 2026న నిందితుడు అప్పుడే పుట్టిన దూడను చూపిస్తానని చెప్పి చిన్నారిని పశువుల షెడ్డుకు తీసుకెళ్లాడు. అక్కడ చిన్నారిపై లైంగిక దాడికి పాల్పడి అనంతరం బండరాయితో హత్య చేసినట్లు దర్యాప్తులో తేలింది. చిన్నారి కనిపించకపోవడంతో కుటుంబ సభ్యులు వెతకగా, షెడ్డులో మృతదేహం లభించింది. పోలీసులు వెంటనే కేసు నమోదు చేసి సీసీటీవీ ఫుటేజ్‌, ఇతర ఆధారాల సాయంతో నిందితుడిని అరెస్టు చేశారు. కేసు విచారణను వేగంగా పూర్తి చేసిన ప్రత్యేక కోర్టు నిందితుడిపై అభియోగాలు రుజువయ్యాయని నిర్ధారించింది. తీర్పులో భాగంగా ఈ కేసును 'రేర్‌స్ట్ ఆఫ్ ది రేర్'గా పరిగణించిన కోర్టు, చిన్నారి అమాయకత్వాన్ని దుర్వినియోగం చేస్తూ అత్యంత దారుణంగా నేరానికి పాల్పడినందున మరణశిక్షే తగిన శిక్ష అని పేర్కొంది. రాష్ట్రవ్యాప్తంగా సంచలనం సృష్టించిన ఈ కేసులో వచ్చిన తీర్పు న్యాయవ్యవస్థ కఠిన వైఖరిని మరోసారి ప్రతిబింబించింది.