పెట్టుబడుల గ్రౌండింగ్‌పై ఫోకస్‌.. సింగపూర్‌తో భాగస్వామ్యం బలోపేతం: లోకేశ్‌

ఆంధ్రప్రదేశ్‌లో పెట్టుబడుల గ్రౌండింగ్‌ను వేగవంతం చేయడంపై ప్రభుత్వం ప్రత్యేక దృష్టి సారించినట్లు రాష్ట్ర విద్య, ఐటీ శాఖల మంత్రి నారా లోకేశ్ తెలిపారు. సింగపూర్ కాన్సులేట్ జనరల్ ఎడ్గర్ పాంగ్ తే చియాంగ్‌తో జరిగిన సమావేశంలో రాష్ట్ర అభివృద్ధి, పరిశ్రమలు, విద్య, సాంకేతికత, పెట్టుబడులు, వాణిజ్య రంగాల్లో ద్వైపాక్షిక సహకారాన్ని విస్తరించే అంశాలపై చర్చించారు. ఈ సందర్భంగా మంత్రి మాట్లాడుతూ రాష్ట్రంలో ప్రస్తుతం 750 పరిశ్రమలు వివిధ దశల్లో ఉన్నాయని చెప్పారు. కేవలం పెట్టుబడి ఒప్పందాలకే పరిమితం కాకుండా, అవి క్షేత్రస్థాయిలో అమలయ్యేలా ప్రభుత్వం క్రమం తప్పకుండా సమీక్షలు నిర్వహిస్తోందని వివరించారు. ప్రతి 15 రోజులకు ఒకసారి ప్రాజెక్టుల పురోగతిని పరిశీలిస్తున్నామని వెల్లడించారు. రాష్ట్రంలో 22 ఇండస్ట్రియల్ క్లస్టర్లను అభివృద్ధి చేస్తున్నామని, గూగుల్‌, ఆర్సెలార్ మిట్టల్ వంటి అంతర్జాతీయ సంస్థలు ఇప్పటికే పెట్టుబడులు పెట్టాయని పేర్కొన్నారు. గతంలో ఏర్పడిన సమస్యలను పరిష్కరించి పారదర్శక విధానాలతో ముందుకు సాగుతున్నామని తెలిపారు. విద్యా రంగంలో కూడా సంస్కరణలు కొనసాగుతున్నాయని, ఉపాధ్యాయుల అధ్యయన పర్యటనల ద్వారా అంతర్జాతీయ ప్రమాణాలను తీసుకురావాలని లక్ష్యంగా పెట్టుకున్నామని చెప్పారు. సింగపూర్ కాన్సులేట్ జనరల్ ఎడ్గర్ పాంగ్ తే చియాంగ్ మాట్లాడుతూ పెట్టుబడుల ఆకర్షణలో ఆంధ్రప్రదేశ్ ముందంజలో ఉందని ప్రశంసించారు. పరిశ్రమలకు అనుకూల విధానాలు, వేగవంతమైన నిర్ణయాలు, అభివృద్ధి దిశగా ప్రభుత్వం తీసుకుంటున్న చర్యలు భవిష్యత్తులో మరిన్ని పెట్టుబడులకు దోహదం చేస్తాయని అభిప్రాయపడ్డారు.