శంషాబాద్ ఎయిర్‌పోర్టులో లేజర్ లైట్ల కలకలం.. తప్పిన పెను ప్రమాదం

శంషాబాద్ రాజీవ్ గాంధీ అంతర్జాతీయ విమానాశ్రయంలో ఆదివారం అర్ధరాత్రి జరిగిన లేజర్ లైట్ల ఘటన విమానయాన భద్రతపై ఆందోళన కలిగించింది. జర్మనీలోని ఫ్రాంక్‌ఫర్ట్ నుంచి వచ్చిన లుఫ్తాన్సా విమానం ల్యాండింగ్‌కు సిద్ధమవుతుండగా కాక్‌పిట్‌పై లేజర్ కాంతులు ప్రసరించాయి. ఈ పరిస్థితిని గమనించిన పైలట్ వెంటనే అప్రమత్తమై అన్ని భద్రతా నిబంధనలు పాటిస్తూ విమానాన్ని సురక్షితంగా రన్‌వేపై దింపారు. అనంతరం ఘటనను ఎయిర్ ట్రాఫిక్ కంట్రోల్ అధికారులకు నివేదించారు. పైలట్ ఫిర్యాదు మేరకు విమానాశ్రయ అధికారులు, భద్రతా విభాగాలు దర్యాప్తు ప్రారంభించాయి. లేజర్ కాంతులు ఏ ప్రాంతం నుంచి ప్రసరించాయనే అంశాన్ని గుర్తించేందుకు సీసీటీవీ ఫుటేజ్‌, ఇతర సాంకేతిక వివరాలను విశ్లేషిస్తున్నారు. విమానాల టేకాఫ్‌, ల్యాండింగ్ సమయంలో లేజర్ కాంతులు పైలట్ల దృష్టిని తాత్కాలికంగా ప్రభావితం చేసే ప్రమాదం ఉందని అధికారులు తెలిపారు. అందుకే ఇలాంటి చర్యలను అత్యంత తీవ్రమైన భద్రతా ఉల్లంఘనగా పరిగణిస్తూ బాధ్యులపై కఠిన చర్యలు తీసుకునే అవకాశముందని స్పష్టం చేశారు.