సింహాద్రి అప్పన్న ఆలయంలో ముగ్గురు ఉద్యోగులు సస్పెండ్‌

విశాఖపట్నంలోని ప్రముఖ సింహాద్రి అప్పన్న దేవస్థానంలో అధికారులు క్రమశిక్షణ చర్యలు చేపట్టారు. విధుల్లో అవకతవకలు, నిర్లక్ష్యం వంటి ఆరోపణల నేపథ్యంలో ముగ్గురు ఉద్యోగులను సస్పెండ్‌ చేయగా, మరో ఉద్యోగికి షోకాజ్‌ నోటీసు జారీ చేశారు.దేవస్థానంలో పనిచేస్తున్న మహిళా ఉద్యోగి ఎన్. నయనారుపై భక్తుల నుంచి డబ్బులు తీసుకున్నారన్న ఆరోపణలు వచ్చాయి. రూ.300 క్యూలైన్‌ టికెట్ల కోసం భక్తుల నుంచి నగదు తీసుకున్నప్పటికీ వారికి టికెట్లు ఇవ్వలేదని ఫిర్యాదులు వచ్చినట్లు తెలుస్తోంది. నీలాద్రి గుమ్మం వద్ద టికెట్‌ లేకుండా వచ్చిన కొంతమంది భక్తులను ఔట్‌సోర్సింగ్‌ ఉద్యోగి అడ్డుకుని ప్రశ్నించగా, తాము డబ్బులు చెల్లించినా టికెట్లు ఇవ్వలేదని వారు అధికారులకు చెప్పినట్లు సమాచారం.దీంతో అధికారులు సంబంధిత టికెట్‌ కౌంటర్‌ను తనిఖీ చేశారు. ఈ తనిఖీల్లో నయనారు వద్ద లెక్కలో చూపని అదనపు రూ.4,700 నగదు ఉన్నట్లు గుర్తించినట్లు తెలుస్తోంది. ఈ వ్యవహారంపై అధికారులు విచారణ జరిపి చర్యలు తీసుకున్నట్లు సమాచారం. మరోవైపు విధుల్లో మద్యం సేవించినట్లు ఆరోపణలు రావడంతో బి. సన్యాసిరావుపై అధికారులు చర్యలు తీసుకున్నారు. అలాగే శానిటేషన్‌ విభాగంలో పనిచేస్తున్న కె. అప్పలరాజు విధుల్లో నిర్లక్ష్యం వహించినట్లు గుర్తించి ఆయనను కూడా సస్పెండ్‌ చేశారు. ఇక కప్పస్తంభం వద్ద విధులు నిర్వహిస్తున్న ఉద్యోగి అరుణ్‌కుమార్‌కు అధికారులు షోకాజ్‌ నోటీసు జారీ చేశారు. విధుల్లో నిర్లక్ష్యంపై వివరణ ఇవ్వాలని ఆదేశించారు. దేవస్థానంలో భక్తులకు ఎలాంటి ఇబ్బందులు కలగకుండా విధులు నిర్వహించడంతో పాటు, టికెట్ల విక్రయాలు మరియు నగదు లావాదేవీల్లో పారదర్శకత పాటించాల్సిన అవసరాన్ని ఈ ఘటన మరోసారి స్పష్టం చేసింది.