సంజీవని గేమ్ చేంజర్‌గా మారుతుంది: సీఎం చంద్రబాబు

అల్లూరి సీతారామరాజు జిల్లాలో పర్యటించిన ఆంధ్రప్రదేశ్ ముఖ్యమంత్రి చంద్రబాబు నాయుడు గిరిజన ప్రాంతాల్లో ఆరోగ్య సేవలను మరింత మెరుగుపరిచేందుకు సంజీవని కార్యక్రమాన్ని ప్రారంభించారు. అరకులోయ మండలంలోని గన్నెలలో సంజీవని ప్రాజెక్ట్‌తో పాటు ఆరోగ్య రథాలను ప్రారంభించి, ప్రజలకు ప్రభుత్వం అందిస్తున్న వైద్య సేవలపై వివరాలు తెలుసుకున్నారు. మారుమూల ప్రాంతాల్లో నివసించే గిరిజన ప్రజలు వైద్యం కోసం కొండలు దాటి, కిలోమీటర్ల దూరం ప్రయాణించాల్సిన పరిస్థితి ఉండకూడదని సీఎం అన్నారు. ప్రతి గిరిజన కుటుంబానికి నాణ్యమైన వైద్యం అందించడమే ప్రభుత్వ లక్ష్యమని తెలిపారు. ముఖ్యంగా ప్రతి గిరిజన బిడ్డ ఆరోగ్యంగా ఎదగాలని, వారి జీవన ప్రమాణాలు మెరుగుపడాలని ఆకాంక్షించారు. ఏజెన్సీ ప్రాంతాల్లో రోగుల నుంచి సేకరించిన రక్త నమూనాలను డ్రోన్ల ద్వారా పెద్ద ఆస్పత్రులకు తరలించి పరీక్షలు నిర్వహించేలా చర్యలు చేపడుతున్నామని చంద్రబాబు తెలిపారు. అత్యవసర వైద్య సేవల కోసం ఎమర్జెన్సీ లైఫ్‌లైన్ నెట్‌వర్క్‌ను కూడా బలోపేతం చేస్తున్నామని చెప్పారు. గర్భిణులకు తల్లిబిడ్డా ఎక్స్‌ప్రెస్ ద్వారా వైద్య సేవలు అందించడంతో పాటు 104 వాహనాల ద్వారా మారుమూల ప్రాంతాల్లో వైద్య పరీక్షలు నిర్వహించనున్నట్లు వివరించారు. గిరిజన ప్రాంతాల్లో ఆరోగ్య మౌలిక వసతులను మెరుగుపరిచేందుకు రూ.250 కోట్లతో ట్రైబల్ హెల్త్ ఇన్‌ఫ్రాస్ట్రక్చర్ కంప్లీషన్ మిషన్ తీసుకురానున్నట్లు సీఎం వెల్లడించారు. సికిల్ సెల్, తలసేమియా బాధితులకు నెలకు రూ.10,000 పెన్షన్ అందిస్తున్నామని తెలిపారు. యోగా, ధ్యానం వంటి కార్యక్రమాలను ప్రోత్సహిస్తూ ప్రజారోగ్యానికి ప్రాధాన్యం ఇస్తున్నామని చెప్పారు. అదే సమయంలో గిరిజన ప్రాంతాల అభివృద్ధిపై కూడా సీఎం పలు అంశాలను ప్రస్తావించారు. అరకు కాఫీ సాగును మరో లక్ష ఎకరాలకు విస్తరించేందుకు ప్రోత్సహిస్తున్నామని, హోమ్‌స్టేల ద్వారా గిరిజన కుటుంబాలకు అదనపు ఆదాయం కల్పించే అవకాశాలు ఉన్నాయని తెలిపారు. పరిశ్రమల్లో గిరిజన యువతకు ఉద్యోగ అవకాశాలు లభించేలా నైపుణ్య శిక్షణ అందిస్తామని చెప్పారు. గ్రామంలో ప్రజలతో ముఖాముఖి నిర్వహించిన చంద్రబాబు, ప్రభుత్వం అమలు చేస్తున్న సంక్షేమ పథకాలు అందుతున్నాయా లేదా అని అడిగి తెలుసుకున్నారు. గర్భిణుల ఆరోగ్యం, పిల్లల విద్య, వైద్య సేవల గురించి ప్రత్యేకంగా ఆరా తీశారు. గిరిజన ప్రాంతాల్లో ఆరోగ్యం, విద్య, ఉపాధి, మౌలిక వసతులు మెరుగుపడితేనే నిజమైన అభివృద్ధి సాధ్యమవుతుందని సీఎం పేర్కొన్నారు. “సంజీవని కార్యక్రమం రాష్ట్రంలోనే కాకుండా దేశంలోనూ గేమ్ చేంజర్‌గా మారుతుంది” అని చంద్రబాబు నాయుడు అన్నారు.